هم مثلا: {اَلْحَمْدُ ِﷲِ فَاطِرِ السَّمٰوَاتِ وَ اْلاَرْضِ جَاعِلِ الْمَلٰئِكَةِ رُسُلاً اُولِى اَجْنِحَةٍ مَثْنٰى وَ ثُلاَثَ وَ رُبَاعَ يَزِيدُ فِى الْخَلْقِ مَا يَشَاءُ اِنَّ اﷲَ عَلٰى كُلِّ شَيْءٍ قَدِيرٌ}

ايشته شو سوره‌ده، ”سماوات و أرضڭ فاطرِ ذو الجلالى، سماوات و أرضى اويله بر طرزده تزيين ايدوب آثارِ كمالنى گوسترمكله حدسز سيرجيلرندن فاطرينه حدسز مدح و ثنالر ايتديرييور و اويله ده حدسز نعمتلرله سوسلنديرمش كه، سما و زمين بتون نعمتلرڭ و نعمت‌ديده‌لرڭ لسانلريله او فاطرِ رحماننه نهايتسز حمد و ستايش ايدرلر.“ ديدكدن صوڭره، يرڭ شهرلرى و مملكتلرى ايچنده فاطرڭ ويرديگى جهازات و قنادلريله سير و سياحت ايدن إنسانلرله حيوانات و طيور گبى؛ سماوى سرايلر اولان ييلديزلر و علوى مملكتلرى اولان برجلرده گزمك و طيران ايتمك ايچون، او مملكتڭ سكنه‌لرى اولان مَلكلرينه قناد ويرن ذاتِ ذو الجلال، ألبته هر شيئه قدير اولمق لازم گلير. بر سينگه، بر ميوه‌دن بر ميوه‌يه؛ بر سرچه‌يه، بر آغاجدن بر آغاجه اوچمق قنادينى ويرن، زهره‌دن مشترى‌يه، مشتريدن زحله اوچه‌جق قنادلرى او ويرييور. هم ملائكه‌لر، سكنۀِ زمين گبى جزئيته منحصر دگللر، بر مكانِ معيّن اونلرى قيد ايده‌ميور. بر وقتده درت ويا داها زياده ييلديزلرده بولونديغنه إشارت {مَثْنٰى وَ ثُلاَثَ وَ رُبَاعَ} كلمه‌لريله تفصيل ويرر. ايشته شو حادثۀِ جزئيه اولان ”ملائكه‌لرى قنادلرله تجهيز ايتمك“ تعبيريله، غايت كلّى و عمومى بر عظمتِ قدرتڭ دستگاهنه إشارت ايده‌رك؛ {اِنَّ اﷲَ عَلٰى كُلِّ شَيْءٍ قَدِيرٌ} فذلكه‌سيله تحقيق ايدوب تثبيت ايدر.