الجواب: بر تمثيل ايله، شو علوى حقيقته شويله بر إشارت ايدرز كه، مثلا: غايت گوزل و شعشعه‌لى بر باغده محتشم بر ذات غايت بيوك بر ضيافت، غايت مزيَّن بر سيرانگاه اويله بر صورتده إحضار ايتمش كه: قوّۀِ ذائقه‌نڭ حسّ ايده‌جك بتون لذائذِ مطعوماتى جامع، قوّۀِ باصره‌نڭ خوشنه گيده‌جك بتون محاسنى شامل، قوّۀِ خياليه‌يى كيفلنديره‌جك بتون غرائبى مشتمل و هكذا.. بتون حواسِّ ظاهره و باطنه‌يى اوقشايه‌جق و ممنون ايده‌جك هر شيئى ايچنه قويمشدر. شيمدى ايكى دوست وار. برابر او ضيافته گيدرلر. بر لوجه‌ده، بر سفره‌ده اوطورويورلر. فقط بريسنڭ قوّۀِ ذائقه‌سى پك آز اولديغندن جزئى ذوق آلير. گوزى ده آز گورويور. قوّۀِ شامّه‌سى يوق. صنايعِ غريبه‌دن آڭلاماز. خارقه شيلرى بيلمز. او نزهتگاهڭ، بيڭدن و بلكه ميليوندن بريسنى، قابليتى نسبتنده آنجق ذوق ايده‌رك إستفاده ايدر. ديگرى ايسه بتون ظاهرى و باطنى طويغولرى، عقل و قلب و حسّ و لطيفه‌لرى، او درجه مكمّل و او مرتبه إنكشاف ايتمشدر كه؛ او سيرانگاهده‌كى بتون اينجه‌لكلرى، گوزللكلرى و لطائفى و غرائبى آيرى آيرى حسّ ايدوب ذوق ايده‌رك، آيرى آيرى لذّت آلديغى حالده او دوست ايله اوموز اوموزه‌در. مادام بو قارمه‌قاريشق، ألملى و طاراجق شو دنياده بويله اولويور. أڭ كوچك ايله أڭ بيوك برابر ايكن، ثرادن ثريّايه قدر فرق اولويور. ألبته دارِ سعادت و أبديت اولان جنّتده بِالطريق الأولٰى دوست دوستى ايله برابر ايكن، هر بريسى إستعدادينه گوره سفرۀِ رحمٰن الرّحيمدن، إستعدادلرى درجه‌سنده حصّه‌لرينى آليرلر. بولوندقلرى جنّتلر آيرى آيرى ده اولسه، برابر بولونمه‌لرينه مانع اولماز. چونكه جنّتڭ سكز طبقه‌سى بربرندن يوكسك اولدقلرى حالده، عمومڭ طامى عرشِ أعظمدر. ناصلكه محروطى بر طاغڭ أطرافنده، بربرى ايچنده، بربرندن يوكسك، قاعده‌سندن ذروه‌سنه قدر سورلى دائره‌لر بولونسه؛ او دائره‌لر بربرينڭ اوستنده‌در فقط بربرينڭ گونش گورمه‌لرينه مانع اولماز، بربرندن گچه‌بيلير، بربرينه باقار. اويله ده جنّتلر ده بوڭا ياقين بر طرز ايله اولديغى، أحاديثڭ متنوّع رواياتى إشارت ايدييور.