صوڭره او مدّعى دونر، فرعونلاشمش فلسفه لسانيله دير كه: ”مادام كنديڭه مالك و صاحب دگلسڭ، بر خدمتكارسڭ؛ أسباب نامنه بنمسڭ.“ دير. او وقت گونش، حق و حقيقت نامنه و عبوديت لسانيله دير كه: ”بن اويله برينڭ اولابيليرم كه؛ بتون أمثالم اولان علوى ييلديزلرى ايجاد ايدن و سماواتنده كمالِ حكمتله يرلشديرن و كمالِ حشمتله دونديرن و كمالِ زينتله سوسلنديرن بر ذات اولابيلير.“

صوڭره او مدّعى، قلبندن دير كه: ”ييلديزلر چوق قالابالقدرلر. هم طاغنيق، قارمه‌قاريشيق گورونويورلر. بلكه اونلرڭ ايچنده، مؤكّللرم نامنه بر شى قزانيرم.“ دير. اونلرڭ ايچنه گيرر. اونلره أسباب نامنه، شريكلرى حسابنه و طغيان ايتمش فلسفه لسانيله، نجوم‌پرست اولان صابئيونلرڭ ديدكلرى گبى دير كه: ”سزلر، پك چوق طاغنيق اولديغڭزدن، آيرى آيرى حاكملرڭ تحتِ حكمنده بولونويورسڭز.“ او وقت ييلديزلر نامنه بر ييلديز دير كه: ”نه قدر سرسم، عقلسز و أحمق و گوزسزسڭ كه؛ بزم يوزيمزده‌كى سكّۀِ وحدتى و طرّۀِ أحديتى گورمييورسڭ، آڭلاميورسڭ. و بزم نظاماتِ عاليه‌مزى و قوانينِ عبوديتمزى بيلمييورسڭ. بزى إنتظامسز ظن ايدييورسڭ. بزلر اويله بر ذاتڭ صنعتى‌يز و خدمتكارلرى‌يز كه، بزم دڭزيمز اولان سماواتى و شجره‌مز اولان كائناتى و مسيره‌گاهمز اولان نهايتسز فضاىِ عالمى قبضۀِ تصرّفنده طوتان بر واحدِ أحددر. بزلر دونانما ألكتريق لامبالرى گبى، اونڭ كمالِ ربوبيتنى گوسترن نورانى شاهدلرز و سلطنتِ ربوبيتنى إعلان ايدن ايشيقلى برهانلرز. هر بر طائفه‌مز اونڭ دائرۀِ سلطنتنده علوى، سفلى، دنيوى، برزخى، اُخروى منزللرده حشمتِ سلطنتنى گوسترن و ضيا ويرن نورانى خدمتكارلرز.