صوڭره او مدّعى گيدر. ”بلكه كُرۀِ أرضى قانديروب اوراده بر ير بولورم“ دير. گيدر، كُرۀِ أرضه (حاشيه) ينه أسباب نامنه و طبيعت لسانيله دير كه: ”بويله سرسرى گزديگڭدن، صاحبسز اولديغڭى گوسترييورسڭ. اويله ايسه، سن بنم اولابيليرسڭ.“ او وقت كُرۀِ أرض، حق نامنه و حقيقت ديليله، گوك گورولتيسى گبى بر صدا ايله اوڭا دير كه: ”خلط ايتمه... بن، ناصل سرسرى، صاحبسز اولابيليرم؟ بنم ألبسه‌مى و ألبسه‌مڭ ايچنده‌كى أڭ كوچك بر نقطه‌يى، بر ايپى إنتظامسز بولمش ميسڭ و حكمتسز و صنعتسز گورمش ميسڭ كه، بڭا صاحبسز، سرسرى ديرسڭ. أگر حركتِ سنويه‌م ايله تقريبًا يگرمى بش بيڭ سنه‌لك (حاشيه*) بر مسافه‌ده، بر سنه‌ده گزديگم و كمالِ ميزان و حكمتله وظيفۀِ خدمتمى گورديگم او دائرۀِ عظيمه‌يه حقيقى مالك اولابيليرسه‌ڭ و قارداشلرم و بنم گبى وظيفه‌دار اولان اون سيّاره‌يه و گزدكلرى بتون دائره‌لره و بزم إماممز و بز اونڭله باغلى و جاذبۀِ رحمتله اوڭا طاقيلى اولديغمز گونشى ايجاد ايدوب، يرلشديره‌جك و صاپان طاشى گبى بنى و سيّارات ييلديزلرى اوڭا باغلايه‌جق و كمالِ إنتظام و حكمتله دونديروب إستخدام ايده‌جك بر نهايتسز حكمت و نهايتسز قدرت سنده وارسه، بڭا ربوبيت دعوا ايت؛ يوقسه هايدى جهنّم اول، گيت! بنم ايشم وار. وظيفه‌مه گيدييورم. هم بزلرده‌كى حشمتلى إنتظامات و دهشتلى حركات و حكمتلى تسخيرات گوسترييور كه، بزم اوسته‌مز اويله بر ذاتدر كه؛ بتون موجودات، ذرّه‌لردن ييلديزلره و گونشلره قدر أمربر نفر حكمنده اوڭا مطيع و مسخّردرلر. بر آغاجى، ميوه‌لريله تنظيم و تزيين ايتديگى گبى، قولايجه گونشى، سيّاراتله تنظيم ايدر بر حكيمِ ذو الجلال و حاكمِ مطلقدر.“