سوزلر | اوتوز اوچنجى سوز | 901
(872-924)
يگرمى ايكنجى پنجره

اَلَمْ نَجْعَلِ اْلاَرْضَ مِهَادًا ❊ وَ الْجِبَالَ اَوْتَادًا ❊ وَ خَلَقْنَاكُمْ اَزْوَاجًا ❊

فَانْظُرْ اِلٰى اٰثَارِ رَحْمَتِ اﷲِ كَيْفَ يُحْيِى اْلاَرْضَ بَعْدَ مَوْتِهَا

كُرۀِ أرض بر قفادر كه، يوز بيڭ آغزى واردر. هر بر آغزنده، يوز بيڭ لسانى واردر. هر لساننده، يوز بيڭ برهانى وار كه؛ هر برى چوق جهتله واجب الوجود، واحدِ أحد، هر شيئه قدير، هر شيئه عليم بر ذاتِ ذو الجلالڭ وجوبِ وجودينه و وحدتنه و أوصافِ قدسيه‌سنه و أسماءِ حسنى‌سنه شهادت ايدرلر. أوت أرضڭ أوّلِ خلقتنه باقييورز كه: مايع حالنه گلن بر مادّۀِ سيّاله‌دن طاش و طاشدن طوپراق خلق ايديلمش. مايع قالسه ايدى، قابلِ سكنا اولمازدى. او مايع طاش اولدقدن صوڭره، دمير گبى سرت اولسه ايدى قابلِ إستفاده اولمازدى. ألبته بوڭا بو وضعيتى ويرن، يرڭ سكنه‌لرينڭ حاجتلرينى گورن بر صانعِ حكيمڭ حكمتيدر. صوڭره طبقۀِ ترابيه، طاغلر ديرگى اوزرينه آتيلمش، تا ايچنده‌كى داخلى إنقلابلردن گلن زلزله‌لر، طاغلرله تنفّس ايدوب، زمينى حركتندن و وظيفه‌سندن شاشيرتماسين. هم دڭزڭ إستيلاسندن طوپراغى قورتارسين. هم ذى‌حياتلرڭ لوازماتِ حياتيه‌سنه برر خزينه اولسون. هم هوايى طراسين، غازاتِ مضرّه‌دن تصفيه ايتسين، تا تنفّسه قابل اولسون. هم صولرى بيريكديروب إدّخار ايتسين. هم ذى‌حياته لازم اولان سائر معدنلره منشأ و مدار اولسون.


ايشته بو وضعيت بر قديرِ مطلق و بر حكيمِ رحيمڭ وجوبِ وجودينه و وحدتنه غايت قطعى و قوّتلى شهادت ايدر.


أى جغرافياجى أفندى! بونى نه ايله ايضاح ايدرسڭ؟ هانگى تصادف شو عجائبِ مصنوعات ايله طولو سفينۀِ ربّانيه‌يى بر مشهرِ عجائب ياپه‌رق يگرمى درت بيڭ سنه بر مسافه‌ده، بر سنه‌ده سرعتله چويروب، اونڭ يوزنده ديزيلمش أشيادن هيچ بر شى دوشورمسين؟


سس يوق

سوزلر