مكتوبات | يگرمى آلتنجى مكتوب | 475
(438-490)
بشنجى مسئله

ثانيًا: مكتوبڭزده ”مجرّد {لاَ اِلٰهَ اِلاَّ اﷲُ} كافى ميدر؟ يعنى {مُحَمَّدٌ رَسُولُ اﷲِ} ديمزسه أهلِ نجات اولابيلير مى؟“ دييه ديگر بر مقصدى صورييورسڭز. بونڭ جوابى اوزوندر. يالڭز شيمدى بو قدر ديرز كه:


كلمۀِ شهادتڭ ايكى كلامى بربرندن آيريلماز، بربرينى إثبات ايدر، بربرينى تضمّن ايدر، برى بريسز اولماز. مادام پيغمبر عليه الصلاة والسلام خاتم الأنبيادر، بتون أنبيانڭ وارثيدر؛ ألبته بتون وصول يوللرينڭ باشنده‌در. اونڭ جادّۀِ كبراسندن خارج، حقيقت و نجات يولى اولاماز. عموم أهلِ معرفتڭ و تحقيقڭ إماملرى، سعدئِ شيرازى گبى ديرلر:


مُحَالَسْتْ سَعْدِى بَرَاهِ نَجَاتْ ❊ ظَفَرْ بُرْدَنْ جُزْ دَرْ پَىِ مُصْطَفٰى


هم {كُلُّ الطُّرُقِ مَسْدُودٌ اِلاَّ الْمِنْهَاجَ الْمُحَمَّدِىَّ} ديمشلر.


فقط بعضًا اولويور كه: جادّۀِ أحمديه‌ده (ع‌ص‌م) گيتدكلرى حالده، بيلمييورلر كه جادّۀِ أحمديه‌در و جادّۀِ أحمديه داخلنده‌در.


هم بعضًا اولويور كه: پيغمبرى بيلمييورلر، فقط گيتدكلرى يول، جادّۀِ أحمديه‌نڭ أجزاسندندر.


هم بعضًا اولويور كه: بر كيفيتِ مجذوبانه ويا بر حالتِ إستغراقكارانه ويا بر وضعيتِ منزويانه و بدويانه صورتنده جادّۀِ محمّديه‌يى دوشونميه‌رك، يالڭز {لاَ اِلٰهَ اِلاَّ اﷲُ} اونلره كافى گلييور.


سس يوق

مكتوبات