بر گون يانمه پارلاق بر قاچ گنج گلديلر. حيات و گنجلك و هوسات جهتندن گلن تهلكه‌لردن صاقينمق ايچون تأثيرلى بر إخطار آلمق ايسته‌ين بو گنجلره، بن ده أسكيدن رسالۀِ نوردن مدد ايسته‌ين گنجلره ديديگم گبى ديدم كه: سزده‌كى گنجلك قطعيًا گيده‌جك. أگر سز دائرۀِ مشروعه‌ده قالمازسه‌ڭز، او گنجلك ضايع اولوب باشڭزه هم دنياده، هم قبرده، هم آخرتده كندى لذّتندن چوق زياده بلالر و ألملر گتيره‌جك. أگر تربيۀِ إسلاميه ايله او گنجلك نعمتنه قارشى بر شكر اولارق عفّت و ناموسليلق و طاعتده صرف ايتسه‌ڭز، او گنجلك معنًا باقى قالا‌جق و أبدى بر گنجلك قزانماسنه سبب اولاجق.

حيات ايسه، أگر ايمان اولمازسه وياخود عصيان ايله او ايمان تأثير ايتمزسه؛ حيات، ظاهرى و قيصه‌جق بر ذوق و لذّتله برابر، بيڭلر درجه او ذوق و لذّتدن زياده ألملر، حزنلر، كدرلر ويرر. چونكه إنسانده عقل و فكر اولديغى ايچون، حيوانڭ عكسنه اولارق حاضر زمانله برابر گچمش و گله‌جك زمانلرله ده فطرةً علاقه‌داردر. او زمانلردن دخى هم ألم، هم لذّت آلابيلير. حيوان ايسه، فكرى اولماديغى ايچون، حاضر لذّتنى، گچمشدن گلن حزنلر و گله‌جكدن گلن قورقولر، أنديشه‌لر بوزميور. إنسان ايسه، أگر ضلالت و غفلته دوشمش ايسه، حاضر لذّتنه گچمشدن گلن حزنلر و گله‌جكدن گلن أنديشه‌لر او جزئى لذّتى جدًّا آجيلاشديرييور، بوزويور. خصوصًا غيرِ مشروع ايسه، بتون بتون زهرلى بر بال حكمنده‌در. ديمك حيواندن يوز درجه، لذّتِ حيات نقطه‌سنده آشاغى دوشر. بلكه أهلِ ضلالتڭ و غفلتڭ حياتى، بلكه وجودى، بلكه كائناتى؛ بولونديغى گوندر. بتون گچمش زمان و كائناتلر، اونڭ ضلالتى نقطه‌سنده معدومدر، ئولمشدر. عقل علاقه‌دارلغى ايله اوڭا ظلمتلر، قراڭلقلر ويرييور. گله‌جك زمانلر ايسه، إعتقادسزلغى جهتيله ينه معدومدر. و عدمله حاصل اولان أبدى فراقلر، متماديًا اونڭ فكر يوليله حياتنه ظلمتلر ويرييورلر. أگر ايمان حياته حيات اولسه؛ او وقت هم گچمش، هم گله‌جك زمانلر ايمانڭ نوريله ايشيقلانير و وجود بولور. زمانِ حاضر گبى روح و قلبنه ايمان نقطه‌سنده علوى و معنوى أذواقى و أنوارِ وجوديه‌يى ويرييور. بو حقيقتڭ، إختيار رساله‌سنده يدنجى رجاده ايضاحى وار. اوڭا باقماليسڭز.