الجواب: أوّلا، غايت اوزاق مسافه‌دن باقيلسه، أڭ بيوك شى، أڭ كوچك شى گبى گورونه‌بيلير. بر ييلديز، بر موم قدر دينله‌بيلير.

ثانيًا: هم تبعى، سطحى بر نظرله باقيلسه، غايت محال بر شى، ممكن گورونه‌بيلير. بر زمان بر إختيار آدم رمضان هلالنى گورمك ايچون سمايه باقمش. گوزينه بر بياض قيل اينمش. او قيلى آى ظن ايتمش. آيى گوردم ديمش. ايشته محالدر كه؛ هلال، او بياض قيل اولسون. فقط قصدًا و بِالذّات آيه باقديغى و او صاچى تبعى و طولاييسيله و ايكنجى درجه‌ده گورونديگى ايچون او محالى ممكن تلقّى ايتمش.

ثالثًا: هم قبول ايتمه‌مك باشقه‌در، إنكار ايتمك باشقه‌در. عدمِ قبول بر لاقيدلقدر، بر گوز قپامقدر و جاهلانه بر حكمسزلكدر. بو صورتده چوق محال شيلر اونڭ ايچنده گيزلنه‌بيلير. اونڭ عقلى اونلرله اوغراشماز. امّا إنكار ايسه؛ او عدمِ قبول دگل، بلكه او قبولِ عدمدر. بر حكمدر. اونڭ عقلى حركت ايتمگه مجبوردر. او حالده سنڭ گبى بر شيطان اونڭ عقلنى ألندن آلير، صوڭره إنكارى اوڭا يوتديرر. هم أى شيطان! باطلى حق و محالى ممكن گوسترن غفلت و ضلالت و سفسطه و عناد و مغالطه و مكابره و إغفال و گوره‌نه‌ك گبى شيطانى دسيسه‌لرله چوق محالاتى إنتاج ايدن إنكار و كفرى، او بدبخت إنسان صورتنده‌كى حيوانلره يوتديرمشسڭ!

رابعًا: هم قرآنى، كلامِ بشر فرض ايتمك، لازم گلير كه: عالمِ إنسانيتڭ سماواتنده ييلديزلر گبى پارلايان أصفيالره، صدّيقينلره، أقطابلره بِالمشاهده رهبرلك ايدن و بِالبداهه متماديًا حقّ و حقّانيتى، صدق و صداقتى، أمن و أمانتى عموم طبقاتِ أهلِ كماله تعليم ايدن و أركانِ ايمانيه‌نڭ حقائقيله و أركانِ إسلاميه‌نڭ دساتيريله ايكى جهانڭ سعادتنى تأمين ايدن و بو إجراآتنڭ شهادتيله بِالضروره حق و خالص و صافى حقيقت و غايت طوغرى و پك جدّى اولمق لازم گلن بر كتابى؛ كندى أوصافنڭ و تأثيراتنڭ و أنوارينڭ ضدّيله متّصف تصوّر ايدوب، (حاشا ثمّ حاشا) بر ساخته‌كارڭ تصنيعات و إفترالرينڭ مجموعه‌سى نظريله باقمق؛ سوفسطائيلرى و شيطانلرى دخى اوتانديره‌جق و تيتره‌ته‌جك شنيع بر هذيانِ كفرى اولمقله برابر؛ إظهار ايتديگى دين و شريعتِ إسلاميه‌نڭ شهادتيله و مدّتِ حياتنده گوسترديگى بِالإتّفاق فوق العاده تقواسنڭ و خالص و صافى عبوديتنڭ دلالتيله و بِالإتّفاق كندنده گورونن أخلاقِ حسنه‌نڭ إقتضاسيله و يتيشديرديگى بتون أهلِ حقيقتڭ و صاحبِ كمالاتڭ تصديقيله أڭ معتقد، أڭ متين، أڭ أمين، أڭ صادق بر ذاتى، (حاشا ثمّ حاشا، يوز بيڭ كرّه حاشا) إعتقادسز، أڭ أمنيتسز، اللّٰهدن قورقماز بر وضعيتده فرض ايتمك؛ محالاتڭ أڭ چركين و منفور بر صورتنى و ضلالتڭ أڭ ظلملى و ظلماتلى بر طرزينى إرتكاب ايتمك لازم گلير.