ايشته أى إنسان! أگر يالڭز اوڭا عبد اولسه‌ڭ، بتون مخلوقات اوستنده بر موقع قزانيرسڭ. أگر عبوديتدن إستنكاف ايتسه‌ڭ، عاجز مخلوقاته ذليل بر عبد اولورسڭ. أگر أنانيتنه و إقتدارينه گووه‌نوب توكّل و دعايى بيراقوب، تكبّر و دعوايه صاپسه‌ڭ؛ او وقت اييلك و ايجاد جهتنده آرى و قارينجه‌دن داها آشاغى، ئورومجك و سينكدن داها ضعيف دوشرسڭ. شر و تخريب جهتنده؛ طاغدن داها آغير، طاعوندن داها مضر اولورسڭ.

أوت أى إنسان! سنده ايكى جهت وار: بريسى، ايجاد و وجود و خير و مثبت و فعل جهتيدر. ديگرى؛ تخريب، عدم، شر، نفى، إنفعال جهتيدر. برنجى جهت إعتباريله؛ آريدن، سرچه‌دن آشاغى.. سينكدن، ئورومجكدن داها ضعيفسڭ. ايكنجى جهت إعتباريله؛ طاغ، ير، گوكلردن گچرسڭ. اونلرڭ چكينديگى و إظهارِ عجز ايتدكلرى بر يوكى قالديررسڭ. اونلردن داها گنيش، داها بيوك بر دائره آليرسڭ. چونكه سن اييلك و ايجاد ايتديگڭ وقت، يالڭز وسعتڭ نسبتنده، ألڭ اولاشاجق درجه‌ده، قوّتڭ يتيشه‌جك مرتبه‌ده اييلك و ايجاد ايده‌بيليرسڭ. أگر فنالق و تخريب ايتسه‌ڭ، او وقت فنالغڭ تجاوز و تخريبڭ إنتشار ايدر.

مثلا: كفر بر فنالقدر، بر تخريبدر، بر عدمِ تصديقدر. فقط او تك سيّئه؛ بتون كائناتڭ تحقيرينى و بتون أسماءِ إلٰهيه‌نڭ تزييفنى، بتون إنسانيتڭ ترذيلنى تضمّن ايدر. چونكه شو موجوداتڭ عالى بر مقامى، أهمّيتلى بر وظيفه‌سى واردر. زيرا اونلر، مكتوباتِ ربّانيه و مراياىِ سبحانيه و مأمورينِ إلٰهيه‌درلر. كفر ايسه؛ اونلرى آيينه‌دارلق و وظيفه‌دارلق و معنيدارلق مقامندن دوشوروب، عبثيت و تصادفڭ اويونجغى دركه‌سنه و زوال و فراقڭ تخريبيله چابوق بوزولوب دگيشن موادِّ فانيه‌يه و أهمّيتسزلك، قيمتسزلك، هيچلك مرتبه‌سنه اينديرديگى گبى.. بتون كائناتده و موجوداتڭ آيينه‌لرنده نقشلرى و جلوه‌لرى و جماللرى گورونن أسماءِ إلٰهيه‌يى إنكار ايله تزييف ايدر. و إنسانلق دينلن، بتون أسماءِ قدسيۀِ إلٰهيه‌نڭ جلوه‌لرينى گوزلجه إعلان ايدن بر قصيدۀِ منظومۀِ حكمت و بر شجرۀِ باقيه‌نڭ جهازاتنى جامع چكردك‌مثال بر معجزۀِ قدرتِ باهره و أمانتِ كبرايى عهده‌سنه آلمقله ير، گوك، طاغه تفوّق ايدن و ملائكه‌يه قارشى رجحانيت قزانان بر صاحبِ مرتبۀِ خلافتِ أرضيه‌يى؛ أڭ ذليل بر حيوانِ فانئِ زائلدن داها ذليل، داها ضعيف، داها عاجز، داها فقير بر دركه‌يه آتار. و معناسز، قارمه‌قاريشق، چابوق بوزولور بر عادى لوحه دركه‌سنه اينديرر.