سوزلر | اوتوزنجى سوز | 743
(712-744)

اويله ايسه ذرّه‌لر (حاشيه ١) باشى بوش دگللر.


نتيجۀِ كلام: گچمش يدى قانون، يعنى قانونِ ربوبيت، قانونِ كرم، قانونِ جمال، قانونِ رحمت، قانونِ حكمت، قانونِ عدل، قانونِ إحاطۀِ علمى گبى پك چوق معظّم قانونلرڭ گورونن اوجلرى آرقه‌لرنده برر إسمِ أعظم و او إسمِ أعظمڭ تجلّئِ أعظمنى گوسترييور. و او تجلّيدن آڭلاشيلييور كه: سائر موجودات گبى شو دنياده‌كى تحوّلاتِ ذرّات دخى، غايت عالى حكمتلر ايچون قدرڭ چيزديگى حدود اوزرينه قدرتڭ ويرديگى أوامرِ تكوينيه‌يه گوره حسّاس بر ميزانِ علمى ايله جولان ايدييورلر. عادتا باشقه يوكسك بر عالمه (حاشيه ٢) گيتمگه حاضرلانييورلر. اويله ايسه ذى‌حيات جسملر، او سيّاح ذرّه‌لره گويا برر مكتب، برر قيشله، برر مسافرخانۀِ تربيه حكمنده‌در. و اويله اولديغنه بر حدسِ صادقله حكم ايديله‌بيلير.


الحاصل: برنجى سوزده دينلديگى و إثبات ايديلديگى گبى؛ هر شى ”بسم اﷲ“ دير. ايشته بتون موجودات گبى هر بر ذرّه و ذرّاتڭ هر بر طائفه‌سى و مخصوص هر بر جماعتى، لسانِ حال ايله ”بسم اﷲ“ دير، حركت ايدر.


سس يوق

سوزلر