سوزلر | اوتوز ايكنجى سوز | 855
(788-871)

هم دوست و أحباب ايسه: أگر اونلر ايمان و عملِ صالح سببيله جنابِ حقّڭ دوستلرى ايسه‌لر، ”اَلْحُبُّ فى اﷲ“ سرّنجه او محبّت دخى، حقّه عائددر.


هم رفيقۀِ حياتڭى، رحمتِ إلٰهيه‌نڭ مونس، لطيف بر هديه‌سى اولديغى جهتيله سه‌و و محبّت ايت. فقط چابوق بوزولان حسنِ صورتنه محبّتڭى باغلامه. بلكه قادينڭ أڭ جاذبه‌دار، أڭ طاتلى گوزللگى، قادينلغه مخصوص بر لطافت و نزاكت ايچنده‌كى حسنِ سيرتيدر. و أڭ قيمتدار و أڭ شيرين جمالى ايسه؛ علوى، جدّى، صميمى، نورانى شفقتيدر. شو جمالِ شفقت و حسنِ سيرت، آخر حياته قدر دوام ايدر، زياده‌لشير. و او ضعيفه، لطيفه مخلوقڭ حقوقِ حرمتى، او محبّتله محافظه ايديلير. يوقسه حسنِ صورتڭ زواليله، أڭ محتاج اولديغى بر زمانده بيچاره حقّنى غائب ايدر.


هم أنبياء و أوليايى سومك، جنابِ حقّڭ مقبول عبادى اولمق جهتيله، جنابِ حقّڭ نامنه و حسابنه‌در و او نقطۀِ نظردن اوڭا عائددر.


هم حياتى، جنابِ حقّڭ إنسانه و سڭا ويرديگى أڭ قيمتدار و حياتِ باقيه‌يى قزانديره‌جق بر سرمايه و بر دفينه و باقى كمالاتڭ جهازاتنى جامع بر خزينه جهتيله اونى سومك، محافظه ايتمك، جنابِ حقّڭ خدمتنده إستخدام ايتمك، ينه او محبّت بر جهتده معبوده عائددر.


هم گنجلگڭ لطافتنى، گوزللگنى؛ جنابِ حقّڭ لطيف، شيرين، گوزل بر نعمتى نقطۀِ نظرندن إستحسان ايتمك، سومك، حسنِ إستعمال ايتمك، شاكرانه بر نوع محبّتِ مشروعه‌در.

سس يوق

سوزلر