سوزلر | اوتوز ايكنجى سوز | 869
(788-871)

سؤال: او قدر بيوك و خالى بر جنّت نه‌يه يارار؟


الجواب: ناصلكه أگر ممكن اولسه ايدى، خيال سرعتيله زمينڭ أقطارينى و ييلديزلرڭ أكثرينى گزسه‌ڭ، ”بتون عالم بنمدر“ دييه‌بيليرسڭ. ملائكه و إنسان و حيوانلرڭ إشتراكلرى، سنڭ او حكمڭى بوزماز. اويله ده: او جنّت دخى طولو اولسه، ”او جنّت بنمدر“ دييه‌بيليرسڭ. حديثده بعض أهلِ جنّته ويريلن بش يوز سنه‌لك بر جنّت سرّى، يگرمى سكزنجى سوزده و إخلاص لمعه‌سنده بيان ايديلمشدر.


طوقوزنجى إشارت: ايمان و محبّت اللّٰهڭ نتيجه‌سى: أهلِ كشف و تحقيقڭ إتّفاقيله؛ دنيانڭ بيڭ سنه حياتِ مسعودانه‌سى، بر ساعتنه دگمه‌ين جنّت حياتى و جنّت حياتنڭ دخى بيڭ سنه‌سى، بر ساعت مشاهده‌سنه دگمه‌ين بر قدسى، منزّه جمال و كمال صاحبى اولان ذاتِ ذو الجلالڭ مشاهده‌سى، رؤيتيدر كه؛ (حاشيه) حديثِ قطعى ايله و قرآنڭ نصّيله ثابتدر. حضرتِ سليمان عليه السلام گبى محتشم بر كمال ايله مشهور بر ذاتڭ رؤيتنه إشتياقلى بر مراق، حضرتِ يوسف عليه السلام گبى بر جمال ايله ممتاز بر ذاتڭ شهودينه مراقلى بر إشتياق؛ هركس وجدانًا حسّ ايدر. عجبا دنيانڭ بتون محاسن و كمالاتندن بيڭلر درجه يوكسك اولان جنّتڭ بتون محاسن و كمالاتى، بر جلوۀِ جمالى و كمالى اولان بر ذاتڭ رؤيتى، نه قدر مرغوب، مراق‌آور و شهودى نه درجه مطلوب و إشتياق‌آور اولديغنى قياس ايده‌بيليرسه‌ڭ ايت...

سس يوق

سوزلر