دردنجى إشارت: والديْن و أولاده محبّتِ مشروعه‌نڭ نتيجه‌سى: (نصِّ قرآن ايله) جنابِ أرحم الراحمين، اونلرڭ مقاملرى آيرى آيرى ده اولسه ينه او مسعود عائله‌يه صافى اولارق لذّتِ صحبتى، جنّته لايق بر حسنِ معاشرت صورتنده، دارِ بقاده أبدى ملاقات ايله إحسان ايدر. و اون بش ياشنه گيرمه‌دن، يعنى حدِّ بلوغه واصل اولمادن وفات ايدن چوجقلر، {وِلْدَانٌ مُخَلَّدُونَ} ايله تعبير ايديلن جنّت چوجقلرى شكلنده و جنّته لايق بر طرزده غايت سوسلى، سَويملى بر صورتده، اونلرى جنّتده دخى پدر و والده‌لرينڭ قوجاقلرينه ويرر. ولدپرورلك حسلرينى ممنون ايدر. أبدى او ذوقى و او لذّتى اونلره ويرر. زيرا چوجقلر سنِّ تكليفه گيرمه‌دكلرندن؛ أبدى، سَويملى، شيرين چوجق اولارق قالاجقلر. دنياده‌كى هر لذّتلى شيئڭ أڭ أعلاسى جنّتده بولونور، يالڭز چوق شيرين اولان ولدپرورلك، يعنى چوجقلرينى سَووب اوقشامق ذوقى (جنّت تناسل يرى اولماديغندن) جنّتده يوقدر ظن ايديليردى. ايشته بو صورتده او دخى واردر. هم أڭ ذوقلى و أڭ شيرين بر طرزده واردر. ايشته قبل البلوغ أولادى وفات ايدنلره مژده...

بشنجى إشارت: دنياده ”اَلْحُبُّ فِى اﷲ“ حكمنجه صالح أحبابلره محبّتڭ نتيجه‌سى: جنّتده {عَلٰى سُرُرٍ مُتَقَابِلِينَ} ايله تعبير ايديلن، قارشى قارشى‌يه قورولمش جنّت إسكمله‌لرنده اوطوروب خوش، شيرين، گوزل، طاتلى بر صورتده، دنيا ماجرالرينى و قديم اولان خاطراتلرينى بربرينه نقل ايدوب أگلنديرمه‌لرى صورتنده؛ فراقسز، صافى بر محبّت و صحبت صورتنده أحبابلريله گوروشديره‌جگى، قرآنڭ نصّيله ثابتدر.

آلتنجى إشارت: أنبياء و أوليايه قرآنڭ تعريف ايتديگى طرزده محبّتڭ نتيجه‌سى: او أنبياء و أوليانڭ شفاعتلرندن برزخده، حشرده إستفاده ايتمكله برابر؛ غايت علوى و اونلره لايق مقام و فيوضاتدن او محبّت واسطه‌سيله إستفاضه ايتمكدر.