هم ديمه: ”بن ده هركس گبى‌يم.“ چونكه هركس سڭا قبر قپوسنه قدر آرقداشلق ايدر. هركسله مصيبتده برابر اولمق ديمك اولان تسلّى ايسه، قبرڭ اوبر طرفنده پك أساسسزدر. هم كنديڭى باشى بوش ظن ايتمه. زيرا شو مسافرخانۀِ دنياده نظرِ حكمتله باقسه‌ڭ، هيچ بر شيئى نظامسز غايه‌سز گوره‌مزسڭ. ناصل سن نظامسز، غايه‌سز قالابيليرسڭ؟ زلزله گبى واقعه‌لر اولان شو حادثاتِ كونيه، تصادف اويونجغى دگللر. مثلا: زمينه نباتات و حيوانات أنواعندن گيديريلن بربرى اوستنده، بربرى ايچنده، غايت منتظم و غايت منقّش گوملكلر؛ باشدن آشاغى‌يه قدر غايه‌لرله، حكمتلرله مزيَّن، مجهّز اولدقلرينى گورديگڭ و غايت عالى غايه‌لر ايچنده كمالِ إنتظام ايله مجذوب مولوى گبى دور ايدوب دونديرمسنى بيلديگڭ حالده، ناصل اولويور كه، كُرۀِ أرضڭ بنى آدمدن، باخصوص أهلِ ايماندن بگنمديگى بر قسم أطوارِ غفلتڭ ثقلتِ معنويه‌سندن اوموز سيلكمگه بڭزه‌ين زلزله گبى (حاشيه) موت‌آلود حادثاتِ حياتيه‌سنى؛ بر ملحدڭ نشر ايتديگى گبى غايه‌سز، تصادفى ظن ايده‌رك بتون مصيبتزده‌لرڭ أليم ضايعاتنى بدلسز هباءً منثور گوستروب، مدهش بر يأسه آتارلر. هم بيوك بر خطا، هم بيوك بر ظلم ايدرلر. بلكه اويله حادثه‌لر، بر حكيمِ رحيمڭ أمريله أهلِ ايمانڭ فانى مالنى، صدقه حكمنه چويروب إبقا ايتمكدر و كفرانِ نعمتدن گلن گناهلره كفّارتدر. ناصلكه بر گون گله‌جك، شو مسخّر زمين يوزينڭ زينتى اولان آثارِ بشريه‌يى شرك‌آلود، شكرسز گوروب، چركين بولور. خالقڭ أمريله بيوك بر زلزله ايله بتون يوزينى سيله‌ر، تميزلر. اللّٰهڭ أمريله أهلِ شركى جهنّمه دوكر. أهلِ شكره ”هايدى، جنّته بيورڭ“ دير.

----------------------------------------------------------------------

(حاشيه: إزميرڭ زلزله‌سى مناسبتيله يازيلمشدر