أگر هدايتِ إلٰهيه يتيشسه، ايمان قلبنه گيرسه، نفسڭ فرعونيتى قيريلسه، كتاب اللّٰهى ديڭله‌سه، او واقعه‌ده ايكنجى حالمه بڭزه‌يه‌جك. او وقت بردن كائنات بر گوندوز رنگنى آلير، نورِ إلٰهى ايله طولار. عالم {اَﷲُ نُورُ السَّمٰوَاتِ وَ اْلاَرْضِ} آيتنى اوقور. او وقت زمانِ ماضى، بر مزارِ أكبر دگل، بلكه هر بر عصرى بر نبى‌نڭ ويا أوليانڭ تحتِ رياستنده وظيفۀِ عبوديتى ايفا ايدن أرواحِ صافيه جماعتلرينڭ وظيفۀِ حياتلرينى بيتيرمكله ”اﷲ أكبر“ دييه‌رك مقاماتِ عاليه‌يه اوچمالرينى و مستقبل طرفنه گچمه‌لرينى قلب گوزى ايله گورور. صول طرفنه باقار كه؛ طاغلرمثال بعض إنقلاباتِ برزخيه و اُخرويه آرقه‌لرنده جنّتڭ باغلرنده‌كى سعادت سرايلرنده قورولمش بر ضيافتِ رحمانيه‌يى او نورِ ايمان ايله اوزاقدن اوزاغه فرق ايدر. و فورطنه و زلزله، طاعون گبى حادثه‌لرى، برر مسخّر مأمور بيلير. بهار فورطنه‌سى و ياغمور گبى حادثاتى؛ صورةً خشين، معنًا چوق لطيف حكمتلره مدار گورويور. حتّى موتى، حياتِ أبديه‌نڭ مقدّمه‌سى و قبرى، سعادتِ أبديه‌نڭ قپوسى گورويور. داها سائر جهتلرى سن قياس أيله. حقيقتى تمثيله تطبيق ايت...

اوچنجى نقطه: ايمان هم نوردر، هم قوّتدر. أوت حقيقى ايمانى ألده ايدن آدم، كائناته ميدان اوقويابيلير و ايمانڭ قوّتنه گوره حادثاتڭ تضييقاتندن قورتولابيلير. {تَوَكَّلْتُ عَلَى اﷲِ} دير، سفينۀِ حياتده كمالِ أمنيتله حادثاتڭ طاغلروارى طالغه‌لرى ايچنده سيران ايدر. بتون آغيرلقلرينى قديرِ مطلقڭ يدِ قدرتنه أمانت ايدر، راحتله دنيادن گچر، برزخده إستراحت ايدر. صوڭره سعادتِ أبديه‌يه گيرمك ايچون جنّته اوچابيلير. يوقسه توكّل ايتمزسه، دنيانڭ آغيرلقلرى اوچماسنه دگل، بلكه أسفلِ سافلينه چكر. ديمك ايمان توحيدى، توحيد تسليمى، تسليم توكّلى، توكّل سعادتِ داريْنى إقتضا ايدر. فقط ياڭليش آڭلامه. توكّل، أسبابى بتون بتون ردّ ايتمك دگلدر. بلكه أسبابى دستِ قدرتڭ پرده‌سى بيلوب رعايت ايده‌رك؛ أسبابه تشبّث ايسه، بر نوع دعاءِ فعلى تلقّى ايده‌رك؛ مسبّباتى يالڭز جنابِ حقدن ايسته‌مك و نتيجه‌لرى اوندن بيلمك و اوڭا منّتدار اولمقدن عبارتدر.