سوزلر | يگرمى بشنجى سوز | 495
(485-611)

صوڭره كلاملرڭ ده، مثلا: {قُلْ هُوَ اﷲُ اَحَدٌ} ده آلتى جمله وار. اوچى مثبت، اوچى منفى. آلتى مرتبۀِ توحيدى إثبات ايتمكله برابر شركڭ آلتى أنواعنى ردّ ايدر. هر بر جمله‌سى اوته‌كى جمله‌لره هم دليل اولور، هم نتيجه اولور. چونكه هر بر جمله‌نڭ ايكى معناسى وار. بر معنا ايله نتيجه اولور، بر معنا ايله ده دليل اولور. ديمك سورۀِ إخلاصده اوتوز سورۀِ إخلاص قدر، منتظم، بربرينى إثبات ايدر دليللردن مركّب سوره‌لر واردر. مثلا:


قُلْ هُوَ اﷲُ ِلاَنَّهُ اَحَدٌ ِلاَنَّهُ صَمَدٌ ِلاَنَّهُ لَمْ يَلِدْ ِلاَنَّهُ لَمْ يُولَدْ

ِلاَنَّهُ لَمْ يَكُنْ لَهُ كُفُوًا اَحَدٌ

هم: وَلَمْ يَكُنْ لَهُ كُفُوًا اَحَدٌ ِلاَنَّهُ لَمْ يُولَدْ ِلاَنَّهُ لَم يَلِدْ ِلاَنَّهُ صَمَدٌ ِلاَنَّهُ اَحَدٌ ِلاَنَّهُ هُوَ اﷲُ

هم: {هُوَ اﷲُ فَهُوَ اَحَدٌ فَهُوَ صَمَدٌ فَاِذَا لَمْ يَلِدْ فَاِذَا لَمْ يُولَدْ فَاِذَا لَمْ يَكُنْ لَهُ كُفُوًا اَحَدٌ} داها سن بوڭا گوره قياس ايت...


مثلا: {الم ❊ ذٰلِكَ الْكِتَابُ لاَ رَيْبَ فِيهِ هُدًى لِلْمُتَّقِينَ} شو درت جمله‌نڭ هر بريسنڭ ايكى معناسى وار. بر معنا ايله اوته‌كى جمله‌لره دليلدر. ديگر معنا ايله اونلره نتيجه‌در. اون آلتى مناسبت خطلرندن بر نقشِ نظمئِ إعجازى حاصل اولور. ”إشارات الإعجاز“ده اويله بر طرزده بيان ايديلمش كه، بر نقشِ نظمئِ إعجازى تشكيل ايدر. اون اوچنجى سوزده بيان ايديلديگى گبى، گويا أكثر آياتِ قرآنيه‌نڭ هر بريسى أكثر آياتڭ هر بريسنه باقار بر گوزى و ناظر بر يوزى واردر كه، اونلره مناسباتڭ خطوطِ معنويه‌سنى اوزاتيور. برر نقشِ إعجازى نسج ايدييور. ايشته ”إشارات الإعجاز“ باشدن آشاغى‌يه قدر بو جزالتِ نظميه‌يى شرح ايتمشدر.


سس يوق

سوزلر