بەڵێ، بۆ ئەوەی باشتر بۆت روون ببێتەوە کە پەیداکردنی رۆزیی "حەڵا‏ڵ" پشت بە ھێز و دەستەڵا‏ت نابەستێت، بەڵکو بە پێچەوانەوە، لاوازی و بێ‏دەستەڵا‏تی دەبن بەھۆی دەست‏کەوتنی رۆزی، ئەوا تەنھا بەراوردکردنێک لە نێوان: "ماسی‏یە دەبەنگەکان" و "رێوی".. ھەروەھا لە نێوان "بێچووە بێ‏ھێزەکان" و "جانەوەرە درندەکان".. ھەروەھا "درەختە راوەستاوەکان" و "ئاژەڵە بە ھەڵپە و تەماعەکان"دا، سەروزیادە بۆ ئەوەی ئەم راستی‏یەت بە تەواوی بۆ روون ببێتەوە!

کەواتە ئەو کەسەی لە پێناوی ژیان و گوزەران‏دا نوێژ و پەرستشەکانی پشت‏گوێ دەخات، وەک ئەو سەربازە وایە کە مەشق و سەنگەری جیھاد بەجێ دەھێڵـێت و دەکەوێتە دەست‏پان‏کردنەوە لە بازارەکان‏دا.

بەڵا‏م ئەو کەسەی پاش بەجێ‏ھێنانی نوێژ و پەرستشەکان، کاروبارەکانی رادەپەرێنێت و لە گەنجینەی میھرەبانیی خواوەندی رۆزیدەردا بە شوێن رۆزیی خۆیدا دەگەرێت، تاکو نەبێت بە بار بەسەر کەسی ترەوە و دەست لە ھیچ کەسێک پان نەکاتەوە.. ئەم کردارە، لە راستی‏دا کارێکی گەلـێ جوامێرانەیە، تەنانەت ئەم چەشنە کردارە بۆ خاوەنەکەی بە جۆرێک لە جۆرەکانی پەرستش دەژمێررێت و پاداشتی بۆ دەنووسرێت.

سەرەرای ئەمەش، سروشتی مرۆڤ و ئامێرە مەعنەوی‏یەکانی، بە ئاشکرا دەری دەخەن کە مرۆڤ تەنھا بۆ "خواپەرستی" خوڵقێنراوە و بەس، چونکە ئەو کردار و توانستەی کە لە مرۆڤدایە و بتوانێت بۆ ژیانی دنیای تەرخان بکات، ناگاتە ئەندازەی ئەو کردار و توانستەی کە لە بچووکترین و بێ‏دەستەڵا‏ت‏ترین باڵندەی وەک چۆلەکەدا دەبینرێت کە زۆر زیاتر و باشتر لە مرۆڤ‏ لەزەت لە ژیان دەبات! بەڵا‏م سەبارەت بە ژیانی مەعنەویی دوارۆژەوە و ئەو شتانەی کە خوا پێی بەخشیوە، وەک: زانست و، ھەژاری لە بەردەم دەستەڵا‏تی خوایگەورەدا و، نزا و پارانەوە و، پەرستش.. مرۆڤ = لەمانەدا = پادشا و سەرکردەی ھەموو زیندەوەرانە!