بۆ نموونە: "ژیری" کە ئەندام و ئامڕازێکی مرۆڤە، ئەگەر نەیفرۆشیت بە خوای گەورە و، بۆ نەفس و ئارەزووەکانی بەکاری بھێنیت، ئەوا دەبێت بە ئەندامێکی نەگبەت و بێ توانا و مایەی بێزاری! چونکە ھەموو ئازارە خەمناکەکانی ڕابوردوو ھاودەم لەگەڵ بەڵا‏ و گیروگرفتە ترسناکەکانی داھاتوودا دەخاتە ئەستۆی مرۆڤەوە. ئەو کاتەش پلەی "ژیری" نزم دەبێتەوە و دەبێت بە ئەندامێکی زیان‏بەخش. ھەر لەبەر ئەوەشە کە دەبینی مرۆڤی فاسق بۆ ئەوەی لە بێزاری‏یەکانی "ژیری"ی ڕزگاری ببێت زۆربەی جار لەدەست باری سەختی ژیان ھەڵدێت و پەنا دەباتە بەر مەستی و کاری بێ‏ھوودە!

بەڵا‏م ئەگەر "عەقڵ" بە خاوەنی ڕاستەقینەی خۆی بفرۆشرێتەوە کە خوای گەورەیە و لە پێناوی ئەودا بەکاربھێنرێت، ئەوا دەبێت بە کلیلێک بۆ کردنەوەی خەزێنەی بێ‏سنووری میھرەبانیی خواوەند و گەنجینەی دانایی پەروەردگار. ئیتر بۆ ھەر لایەک بڕوانێت و بە ھەر چەشنێک بیر بکاتەوە، دانایی خواوەند لە ھەموو دروستکراوێک و گشت بوونەوەر و ڕووداوێک‏دا دەبینێت و، میھرەبانیی خوای گەورەی لە ھەموو بوونەوەردا بە درەوشاوەیی بەرچاو دەکەوێت.

بەم پێ‏یە "عەقڵ" بەرز دەبێتەوە تا دەگاتە پلەی ڕابەرێکی پەروەردگاری، کە پلەیەکە خاوەنەکەی بۆ کامەرانیی ھەمیشەیی ئامادە دەکات.